مہنگائی بم کے دھماکے کے ساتھ ہی حکومت نے پٹرول بم بھی چلا دیا عوام کو اس صورتحال میں کچھ سمجھ نہیں آرہی کہ وہ کیا کریں کیونکہ ہاتھوں میں پکڑے کرنسی نوٹ کاغذ کے ٹکڑے لگنے لگے ہیں لوگوں کے آمدن کے ذرائع محدود ہوتے جا رہے ہیں ان میں اب ضروریات کی اشیاء خریدنے کی بھی قوت نہیں رہی جبکہ مقابلے میں ہر گزرتے لمحات کے ساتھ مہنگائی ہرن کی طرح کلانچیں بھرتی دوڑ رہی ہے پاکستانیوں پر پچھلے چالیس برسوں میں ایسا وقت کھبی نہیں آیا ہر دور میں مہنگائی میں اضافہ ہوا لیکن جس تناسب کے ساتھ پچھلے چند ماہ میں مہنگائی میں اضافہ ہو رہا ہے اس کا تو تصور بھی نہیں کیا جا سکتا تھا اس منہ زور مہنگائی نے عام آدمی کا جینا محال کر دیا ہے بدقسمتی یہ بھی ہے کہ ایک طرف بےقابو مہنگائی ہے اور دوسری جانب حکومت کی رٹ کہیں نظر نہیں آتی صنعتکار اپنی مصنوعات میں جو دل چاہے میٹیریل استعمال کرے وہ بے شک انسانی صحت کے لیے کتنا ہی مضر کیوں نہ ہو اسے کوئی پوچھنے والا نہیں وہ اپنی پراڈکٹ کی از خود قیمت مقرر کرتا ہے وہ جو دل چاہے قیمت مقرر کر لے اس پر کوئی چیک نہیں اسی طرح ذخیرہ اندوز جس چیز کو چاہے سٹاک کر کے مصنوعی قلت پیدا کرکے مہنگائی کر دے اس کو کھلی چھٹی ہے انتظامیہ قیمتوں کو کنٹرول نہیں کر پا رہی ایک المیہ اور بھی ہے جتنی چیزیں مہنگی ہو رہی ہیں اتنی ہی ملاوٹ زیادہ ہو رہی ہے اس ملک میں ہر مافیا کا کوئی نہ کوئی پشت پناہ اور والی وارث ہے لیکن عوام کا کوئی والی وارث نہیں ابھی وزیر خزانہ نے فنانس بل ایوان میں پیش کیا ہے ابھی اس کی منظوری نہیں ہوئی ابھی یہ صدرمملکت کے پاس نہیں گیا انھوں نے اس پر دستخط نہیں کیے قانونی طور پر یہ ابھی نافذ العمل نہیں لیکن پورے ملک میں اشیاء کی قیمتوں میں راتوں رات اضافہ کر دیا گیا ہے۔
میں نے اس منفرد قسم کی مہنگائی پر عوام کا فوری ردعمل چیک کرنے کے لیے محلے کی ایک دوکان پر جانے کا فیصلہ کیا میں دوکان کی ایک سائیڈ پر کھڑا ہو کر مناظر دیکھنے لگا ہر آنے والا گاہک دوکاندار سے لڑ رہا تھا کہ یہ چیز ہم کل اس ریٹ پر خرید کر لے گئے تھے آج آپ نے قیمتیں بڑھا دی ہیں دوکاندار ہر گاہک کے ساتھ بحث کر رہا تھا قیمتیں بڑھنے کی توجیہ پیش کرنے کے ساتھ ہی حکومت کو دوچار تبرے بھیجتا اور جواب میں گاہک بھی حکومت کو کلام بھیجتے ہوئے کلاسیکل تبصرے کرتے جاتے کچھ گاہکوں کی باقاعدہ گرمی سردی ہو گئی اور لڑائی ہوتے ہوتے بچی دوکاندار کا ایک ہی جواب تھا جاو جہاں سے سستی ملتی ہے لے لو بعد ازاں میں نے آفس جانے کے لیے لوکل وین میں سفر کرنے کا فیصلہ کیا سارے راستے میں مسافر کنڈیکٹر سے لڑتے نظر آئے ہر مسافر یہ کہتے سنا گیا کہ ہم کل تو اتنے پیسے دے کر گئے تھے یہ راتوں رات کونسا جن پھر گیا ہے کنڈیکٹر بھی حکومت کے پٹرول بم گرانے کی کہانی سنا کر حکومت کو برا بھلا کہتا اور جواب میں بھی ایسے ہی الفاظ سننے کو ملتے کنڈیکٹر نے مہنگے پٹرول کا رونا رو کر کرائے بڑھانے کو اپنی مجبوری قرار دیا لوگ ابھی اس مہنگائی میں اپنے آپ کو ایڈجسٹ نہیں کر پا رہے اور نہ ہی انھیں کچھ سمجھ آ رہی ہے کہ وہ اپنے ردعمل کا اظہار کیسے کریں ابھی چند دنوں تک جب اس مہنگائی بم کے اثرات مکمل طور پر واضح ہوں گے پھر پتہ چلے گا کیا ہوتا ہے ابھی تو حکومت کی خوش قسمتی ہے کہ عمران خان مہنگائی کے ایشو پر سیاست نہیں کر رہا ورنہ جس قسم کی مہنگائی کا عوام کو سامنا کرنا پڑ رہا ہے یہ پٹرول کو ماجس دیکھانے والی بات ہے ابھی تو حکمرانوں کے گھر والوں نے بھی انھیں قبول کرنے سے انکار کر دیا ہے اور کہا ہے کہ یہ حکومت ان کی حکومت نہیں مسلم لیگ ن کے اندر شدید اضطراب پایا جا رہا ہے اور اس وقت چونکہ مریم نواز کو عوام کا سامنا کرنا پڑ رہا ہے تو انھوں نے حکومت سے لاتعلقی کا اعلان کر دیا ہے ایسے معلوم ہوتا ہے کہ میاں شہباز شریف نے فی الحال عوامی سیاست کی بجائے انتظامی سیاست کرنے کا فیصلہ کر لیا ہے اور ایک اور بات واضح ہو گئی ہے کہ حکومت ان حالات میں کسی طور پر الیکشن میں جانے کا رسک نہیں لے سکتی اگر اس وقت الیکشن ہوتے ہیں تو سیدھا سیدھا اقتدار عمران خان کو پلیٹ میں رکھ کر دینے والی بات ہو گی آنے والے چند دن عوامی ردعمل اور حکومتی اقدامات کے حوالے سے بڑے اہم ہوں گے بس دیکھیں اور انتظار کریں۔
