قائدِ اعظم یونیورسٹی اور طلبا سیاست۔

قائدِ اعظم یونیورسٹی اسلام آباد میں طلبا کو سیاسی سرگرمیوں سے دور رکھنے کے لیے طلبا کی سیاسی جماعتوں اور سیاسی سرگرمیوں پر پابندی عائد کی گئی اور طلبا کو صحت مند ثقافتی سرگرمیوں میں مشغول کرنے کی سوچ کے تحت بلوچوں، سندھیوں، پشتونوں اور پنجابیوں کی کونسلز تشکیل دی گئیں۔ میری نظر میں یہ انتہائی عاقبت نااندیش فیصلہ تھا۔ اس کی بنیادی وجہ یہ ہے کہ سیاسی وابستگیاں اور نظریات بدلتے رہتے ہیں۔ لہٰذا ایسے ماحول میں اختلاف اور تلخی کے باوجود تقسیم اتنی گہری نہیں ہوتی کہ اپنے وجود کے علاوہ ہر وجود کو حقیر جانا جائے اور اس سے شدید نفرت رکھی جائے۔

اس کے برعکس لسانی تفریق انسان کو تنگ نظر اور احساسِ کمتری یا احساسِ برتری میں مبتلا کر دیتی ہے۔ تقسیم کی لکیر اتنی گہری ہوتی ہے کہ انسان کچھ بھی کر لے لیکن ایک لسانی گروہ کو چھوڑ کر کسی دوسرے لسانی گروہ کا حصہ نہیں بن سکتا۔ اور قائدِ اعظم یونیورسٹی میں بھی یہی ہوا۔ ملک کے پڑھے لکھے لوگوں میں شمار ہونے والے طلبا میں جب انتظامی سطح پر لسانیت کا زہر گھولنے کا بندوبست کیا گیا تو کئی سال گزرنے کے بعد آج وہ لگایا گیا پودا ایک تناور درخت کی صورت اختیار کر چکا ہے۔

ماضی میں ہوئے لسانی جھگڑوں اور فسادات کی وجہ سے اگرچہ آفیشل سطح پر تمام لسانی کونسلز پر پابندی لگ چکی ہے لیکن ان آفیشل سطح پر تمام کونسلز پوری طرح فعال ہیں۔ اسی فعالیت کی ایک مثال کچھ ماہ پہلے یونیورسٹی میں سندھی اور بلوچ طلبا میں ہونے والا جھگڑا تھا جس کے نتیجے میں یونیورسٹی انتظامیہ کو سیکیورٹی فورسز کو بلا کر آپریشن کروانا پڑا۔ اور کچھ طلبا کو یونیورسٹی سے نکال دیا گیا۔ ایسا کوئی نا کوئی واقعہ تقریباً ہر سیمیسٹر میں رونما ہوتا رہتا ہے۔ ملک کی نمبر ایک یونیورسٹی میں طلبہ کا آئے روز یوں لسانی بنیادوں پر لڑنا جھگڑنا اور یوں سیکیورٹی فورسز کا طلبہ کے خلاف آپریشنز یقیناً باعثِ تکلیف اور باعثِ شرمندگی واقعات ہیں۔ اور اس نفرت پر مبنی تقسیم کا ہمیشہ سے ایک نقصان یہ بھی رہا ہے کہ تمام کونسلز کبھی کسی مشترکہ کاز پر اکٹھی نہیں ہوئیں۔

تین نومبر دو ہزار سات میں جب جنرل پرویز مشرف نے ملک میں ایمرجنسی لگائی تو پورے ملک کے تعلیمی اداروں میں قائدِ اعظم یونیورسٹی اسلام آباد وہ پہلا ادارہ تھا جہاں طلبہ نے اس ایمرجنسی کے خلاف مظاہرے شروع کیے۔ جو بعد میں ملک کے دیگر تعلیمی اداروں تک پھیل گئے۔ وہ انتہائی منظم اور مثبت تحریک تھی۔ مثبت تین اعتبار سے تھی۔ پہلا مثبت اور خوش کُن پہلو یہ تھا کہ طلبا نے سیاسی بلوغت کا مظاہرہ کرتے ہوئے وقت کے طالع آزما کی طالع آزمائی کو چیلنج کیا۔ دوسرا مثبت پہلو یہ تھا کہ وہ تحریک خالص سیاسی بنیادوں پر چلی اور اس تحریک کی قیادت کرنے والے طلبا میں سے کوئی بھی ایسا نہیں تھا جو خاص کسی لسانی گروہ سے وابسطہ ہو۔ نتیجہ یہ نکلا کہ تمام یونیورسٹی کے طلبہ جوق در جوق اس تحریک میں شامل ہوئے۔ روز مظاہرے ہوتے لیکن کوئی ایک بھی کلاس کینسل نہ کروائی جاتی۔ مظاہروں کا وقت ہی ایسا رکھا جاتا جس میں کوئی کلاس نہ ہوتی ہو۔ طلبا اور یونیورسٹی انتظامیہ میں اس تحریک کو شدید پزیرائی حاصل ہوئی۔ تیسرا مثبت پہلو یہ تھا کہ اس تحریک کے تمام سرکردہ رہنماؤں نے یہ طے کیا تھا کہ ہم اپنی اس تحریک میں کسی بیرونی عنصر کو شامل نہیں ہونے دیں گے۔ تقریباً تمام ملکی سیاسی جماعتوں نے اس موقع کو کیش کرنے کی کوشش کی لیکن طلبا نے اپنی منظم مزاحمت سے کسی بھی بیرونی عنصر کو یونیورسٹی کے احاطہ میں داخل نہ ہونے دیا۔ لیکن پھر تحریک کے خاتمے کے ساتھ ہی یہ قابلِ رشک اور خوش کن مناظر بھی اچانک غائب ہو گئے اور لسانی تقسیم کی دھندلا جانے والی لکیریں دوبارہ واضح ہو گئیں۔

کچھ عرصہ قبل یونیورسٹی میں بڑھائی گئی فیسوں کے خلاف اور طلبا کے چند دیگر جائز مطالبات کے حصول کے لیے قائدین اسٹوڈنٹ فیڈریشن کے نام سے ایک متحدہ محاذ تشکیل پایا۔ طلبا نے اتنی منظم تحریک چلائی کہ انتظامیہ کو بالآخر اُن کے تمام مطالبات ماننا پڑے۔ میرے لیے یہ ایک خوش کن احساس تھا کہ شاید طلبا نے لسانی شعور کو خیر باد کہہ کر سیاسی شعور کو دوبارہ اپنا لیا ہے۔ لیکن افسوس کہ میری یہ خوش گمانی ایک سراب ثابت ہوئی۔ کچھ دن پہلے قائدین اسٹوڈنٹ فیڈریشن نے یونیورسٹی کی طرف سے بڑھائی گئی فیسوں، ٹراسپورٹ کی قلت، ہاسٹلز کے ناگفتہ بہہ حالات اور گذشتہ سمسٹر میں بے دخل کیے گئے سندھی اور بلوچ طلبہ کے فیصلے کے خلاف اسٹرائیک کال کی۔